Berlevåg i San Pedro

Døme på ein bildeanalyse

 

Mann i sangerlue

Her kjem eit framlegg til analyse av bildet, men prøv deg sjølv først med dei hjelpespørsmåla du allereie har sett i førre skjemaet.

Grunnspørsmål
Kven som har teke bildet, når og kvar, seier bildet ikkje noko om. Av den årsak får vi ingen informasjonar som kan hjelpe oss til å plassere bildet ved hjelp av fakta. Vi får heller ikkje vite noko om i kva for samanhang det er teke. Men vi prøvar…….

Denotasjon(set ord på det vi ser utan å tolke)
Sjølve motivet er ein medelaldrande mann som står i framgrunnen med eit hamnemiljø i bakgrunnen. Bildet er i breiddeformat. Det er eit portrett teke rett framføre med det føremål å skildre hovudpersonen i ein serleg situasjon.
Mannen står midt i bildet. Han ser litt til sides for fotografen. Han har på seg ein mørk dress med kvit skjorte og mørk sløyfe. På hovudet har han ei kvit songarlue, antakeleg norsk. Det er skumring, men andletet og brystpartiet er godt lyst opp. Mannen er truleg kring femti år og medels høg.
I bakgrunnen ser vi lysa frå ei båthamn. Ho må vere internasjonal, for vi kan skimte palmetre bak mannen. Ser vi godt etter, kan vi òg sjå litt av ei plen og eit fortau like bak han. Hamna er nokså stor, for vi ser ei rekkje kraner langs hamneområdet. Bildet er kransa av store tre på høgre side.

Konnotasjon(tolkar ut frå dei kunnskapar og erfaringar vi sit inne med):
Mannen midt på bildet er medelaldrande. Han er sentralt plassert i bildet, og andletet er godt lyst opp. Han har eit ope og godt andlet og har eit litt ettertenksamt blikk i andletet når han ser forbi fotografen. Er det eit streif av vemod, eller kan hende heller ettertanke? Kvifor er han nett her? Det er kveld, for det er mørkt bak han, men himmelen er enno litt lys, så denne staden må liggje på sørlege breiddegradar kor mørkret kjem meir brått enn det gjer i meir nordiske land.

Bakgrunnen verkar litt merkeleg når han står der med ei norsk songarlue på. Ein skulle kunne tru at han er med på ein songarturne til meir sørlege strøk, sia det er klårt at i bakgrunnen finns det eksotiske vekstar som palmar. Visste ein ikkje betre, kunne ein tru at dette var eit bilde teke i studio med eit bilde av hamna som kulisse bak! Det var nemleg ikkje uvanleg i gamle dagar, men da var bilda i staden i svart-kvit.
Kvifor bildet er teke, er det ikkje så lett å seie, men i alle høve er dette eit bilde prega av ro og som heilt klårt vekkjer gode minne hos hovudpersonen. Det varme lyset på andletet og skjortebrystet til mannen, dei dimme lysa frå hamna er med på å skape eit bilde som er prega av ro og tenksemd, og kor det er heilt klårt at mannen er i eit uvand miljø i høve til den klednaden han har på seg. Men det at han er i festklede, tyder og på at dette bilde er teke i ein særskild situasjon.

Avslutning(samla inntrykk):
Bildet er spennande, avdi det har klåre motsetningar i seg. Kvifor står ein norsk mannsongar i ei sydlansk hamn? Det vekkjer nyfikne, men det er samstundes eit bilde som eggjar til å dikte med.

Faktaopplysningar:
Bildet er teke 15. oktober 2001 utafor Sjømannskyrkja i San Pedro, Los Angeles. Personen på bildet er Oddvar Hansen som då var formann i Berlevåg mannskor. Dette mannskoret fekk ein kjempesuksses gjennom dokumentarfilmen ”Heftig og begeistret”. Dei var no på konsertturne i det norske Amerika, noko som det og vart film av – ”Heftig og begeistret – på sangens vinger”. Nett etter at bildet var teke, heldt dei ein konsert i Sjømannskyrkja der svært mange var til stades. Bildet vart teke som ein del av eit intervju med ei norsk avis(Vårt Land), og medan intervjuet vart halden, fall mørkret på. Difor vart det eit kveldsbilde i staden for eit ettermiddagsbilde – når ein tenkjer på lyskvaliteten. Hansen ville sjølv gjerne verte fotografert med hamna i bakgrunnen, for han hadde sjølv vore sjømann då han var ung, og segla på denne hamna fleire gonger. For han blei da dette òg eit attersyn med ei travel hamn som vekte til live ein periode i livet hans som han hadde mange gode minne frå.